लोकप्रवाह, चोपडा दि. ०१ आॕक्टो. – तालुक्यातील वैजापूर येथील प्राथमिक आरोग्य केंद्रामध्ये “माता सुरक्षित तर घर सुरक्षित” सदर अभियान चोखपणे व उत्साहात राबविण्यात आले. नेहमीप्रमाणेच वैद्यकीय अधिकारी डॉ. योगेंद्र पवार व त्यांचे सहकारी हे आपले कर्तव्य अत्यंत जबाबदारीने बजावत असल्याचे दिसून येत आहे. या सर्व उत्तम कामगिरीकरीता नुकतेच त्यांना मुख्य कार्यकारी अधिकारी डॉ. पंकज आशिया यांच्याकडून प्रशस्तीपत्र देवून सन्मानित करण्यात आले.
“माता सुरक्षित तर घर सुरक्षित” या अभियानांतर्गत वैजापूर येथे 18, कर्जाणे येथे 14, नागलवाडी येथे 9, देवझीरी 5 अशा एकूण 44 प्रसूती माता आणि बाळ यांना सुरक्षित ठेवून करण्यात आल्या. तसेच 11 कुटूंब नियोजन शस्त्रक्रिया सफलपणे करून त्यांना सुरक्षित घरी सोडण्यात आले. त्याचप्रमाणे गर्भपिशवी कॅन्सरसाठी 10 पेशंट ची VIA तपासणी करण्यात आली, NCD च्या 40 मातांची तपासणी करण्यात आली, अतिजोखिम च्या 20 गर्भवती यांना आयर्न सुक्रोज सलाईन लावण्यात आली. JSSK अंतर्गत 44 मातांना मोफत अंबुलन्स सुविधा पुरविण्यात आली, कुष्ठरोगच्या एका मातेला उपचार सुरू करण्यात आले आहे. व संशयित क्षयरोगाचे 30 थुंकीचे नमुने तपासणीसाठी घेण्यात आले.
सदर अभियान जिल्हाधिकारी, मुख्य कार्यकारी अधिकारी डॉ. पंकज आशिया, जिल्हा आरोग्य अधिकारी डॉ. तुषार देशमुख, तालुका आरोग्य अधिकारी डॉ. प्रदिप लासुरकर यांच्या मार्गदर्शनाखाली व वैद्यकीय अधिकारी डॉ. योगेंद्र पवार व सर्व समुदाय आरोग्य अधिकारी यांच्या नेतृत्वाखाली प्राथमिक आरोग्य केंद्र, वैजापूर येथील सर्व कर्मचाऱ्यांनी टिम वर्कच्या माध्यमातून राबविले आहे. यावेळी अंगणवाडी सेविका व आशा सेविका यांच्या कार्याबद्दल सर्वांचे वैद्यकीय अधिकारी डॉ.योगेंद्र पवार आणि डॉ. सुनील बारेला यांनी आभार मानले.
