लोकप्रवाह, चोपडा दि. ०२– येथील महात्मा गांधी शिक्षण मंडळ संचालित ऑक्सफर्ड इंग्लिश मीडियम स्कूलमध्ये राष्ट्रपिता महात्मा गांधी व भारताचे दुसरे पंतप्रधान लालबहादूर शास्त्री यांची जयंती उत्साहात साजरी करण्यात आली. याप्रसंगी महात्मा गांधी आणि लालबहादूर शास्त्री यांच्या प्रतिमेचे पूजन शाळेच्या मुख्याध्यापिका ममता कपिल न्याती आणि अमन पटेल यांच्या हस्ते करण्यात आले. याप्रसंगी शिक्षिका सारिका पवार यांनी महात्मा गांधी आणि लालबहादूर शास्त्री यांच्या जीवनाविषयी माहिती सांगितली. त्यांचे बालपण, शिक्षण, समाजकार्य व राजकीय क्षेत्रातील योगदान यांसारख्या विविध विषयांवरील माहिती त्यांनी सांगितली. शाळेतील संगीत शिक्षिका अश्विनी ढबू यांनी गांधीजींचे आवडते भजन सादर केले. त्यांना शाळेतील शिक्षिका जुईली ठाकरे यांनी तबल्यावर साथ दिली.
कार्यक्रमाचे सूत्रसंचालन प्राजक्ता सोनवणे यांनी तर आभारप्रदर्शन अमन पटेल यांनी केले. शाळेतील कलाशिक्षक शकील अहमद यांनी उत्कृष्ट फलक रेखाटन केले. कार्यक्रमाच्या यशस्वीतेसाठी मुख्याध्यापिका ममता न्याती यांच्या मार्गदर्शनाखाली सर्व शिक्षक व शिक्षकेतर कर्मचाऱ्यांनी परिश्रम घेतले.
