लोकप्रवाह, चोपडा दि. १२ – तालुक्यातील चहार्डी येथील शेतकरी विजय रामदास सोनवणे यांनी एप्रिल २०२२ मध्ये एकुण १ लाख 53 हजार रुपये किंमतीचा 17 टन कांदा हा गावातील उदय रमेश मोरे रा. चहार्डी यांचेवर विश्वास ठेवून त्याचा नातेवाईक आरोपी राजु वाल्मीक कदम रा.लासलगांव ता. सटाणा जि. नाशिक यांस विक्री केला. मात्र फिर्यादीला आजपावेतो सदर कांद्याची रक्कम न मिळाल्यामुळे फसवणूक झाली म्हणून चोपडा शहर पोलीस स्टेशनला दोघांविरुध्द गुन्हा दाखल करण्यात आला.
याबाबत सविस्तर वृत्त असे की, दिनांक 23 एप्रिल 2022 रोजी चहार्डी शिवारात फिर्यादी विजय रामदास सोनवणे यांच्या मालकीचे शेत गट क्रमांक 828 मध्ये लागवड केलेला एकुण १ लाख 53 हजार रुपये किंमतीचा 17 टन कांदा हा आरोपी उदय रमेश मोरे रा. चहार्डी ता. चोपडा यांचेवर विश्वास ठेवून त्याचा नातेवाईक आरोपी राजु वाल्मीक कदम रा.लासलगांव ता. सटाणा जि. नाशिक यांस विक्री केल्यानंतर दोघा आरोपीतांनी फिर्यादी यांचेकडुन कांदा खरेदी करुन घेतल्यावर एकुण १ लाख ५३ हजार रुपयांपैकी फिर्यादी यांना फक्त रुपये ५ हजार मात्र दिले व उर्वरित रक्कम 1,46000/- रुपये आजपावेतो फिर्यादी यांना देण्यास टाळाटाळ करीत विश्वासघात व फसवणुक केली म्हणुन चोपडा शहर पोलीस स्टेशन येथे सीसीटीएनएस. गु.र.नं. ४५५/२०२२ नुसार भादंवि कलम 406, 420, 34 प्रमाणे गुन्हा दाखल करण्यात आला आहे. सदर गुन्ह्याचा पुढील तपास पोलीस निरिक्षक अवतारसिंग चव्हाण यांच्या मार्गदर्शनाखाली पोहेकॉ/1197 प्रदीप राजपुत करीत आहे.
